鄉議局籌建沙田石門新局址進行得如火如荼，今年初招標邀請顧問公司為新局址提供專業意見，而家共收到十四份標書，最後篩選了六間，但當中有驚人發現，其中一間公司竟然係鄉議局執委兼顧問香灼璣名下公司，即係煲呔曾蔭權個建築師表哥。聽講香帥呢份標書搞到鄉議局中人媽媽聲，話佢唔避嫌，出價又巧立名目，據講連廉政公署都覺得份標書有問題。
咖啡都有得飲 據講六份標書之中，個別標書表述顧問費方式有問題，究竟係乜問題呢？就係有標書刻意壓低個價，做到好似平過其他標書咁，但查實呢樣唔包，樣唔包，如果條數計番晒入去，仲貴過其他標書三成，直情係想食鄉議局隻車。身為籌建新局址召集人副主席林偉強，做慣醒目仔，一見到咁情況，梗係第一時間問廉署意見喇！
點知唔問猶自可，一問連廉署都覺得有問題，話如果採納最平份標書，可能會引起訴訟，鄉議局聽到當堂打個冷震，於是聲再進行第二輪澄清和議價，畀機會有問題標書搞番清楚條數，總之要做到公平公正。有鄉議局中人話，如果香帥唔係同鄉議局有咁耐交情，真係隨時可以cut佢份標書，你估同佢有親呀！
其實今次香帥入標，鄉議局中人都議論紛紛，擔心有利益衝突，分分鐘咖啡都有得飲。話就話跟正招標程序，但係香帥之前係負責設計新局址，好多一清二楚，入標內容一定豐富過其他標書，左計右計，點都係數！據聞佢設計完個新局址之後，仲要埋興建局址專利權，搞到鄉議局中人媽媽聲，最後當然無得逞喇！
講開又講，煲呔今個禮拜六在粉嶺別墅宴請鄉議局話事人同二十七個鄉事委員會代表，唔使講，呢餐飯都係為拉票而增進感情喇！